بقعد على قلوبكم

حسبي الله على ميري معلمتها ومدرستها وقايلة لها كل يوم دشي المدونه شوفيها عدليها سنعيها وان كان فيه ناس عطيهم بس جاي الكاكاو مالي خشيه بس ماكوفايده ,,, انا لو معلمه طوفه جان فهمت احسن منها الحين دشيت المدونه وللا عفيسه الظاهر والله اعلم ان فيه ناس ينامون فيها ,,,,, طبعا دامني هادتها ومخليه ميري اهي اللي تشق وتخيط لازم يصير جذيه ماعلينا الحين بس خلها تيي من الجمعية ان مانتفت هالشعرتين اللي في راسها ماكون منالوه ,,,,,,,, والله اني خايفه لتكون اللي في بالي هي داشه وعافسه هالمدونه الاباجوره متغير مكانها والزوليه مكتوت عليها عصير مدري بيبسي ,,,,,,,, بعدين شنو هذا منو اللي كاتب على طوف المدونه منالوه شيلي قشج ,,,,,,,,,,,,,,,عدال عدال الله يعلم منو اللي بيشيل قشه الحين ويطلع ,,,,,,,,,,,,,,,,,,,,,انا اصلا بكتب على باب المدونه الكل يدش ماعداها وهي عارفه روحها وحتى ميري معلمتها وياويلها وياسواد ليلها ان دشيت وشفتها جدامي امجع راسهم هم الثنتين شنو راسهم اللا حتى اظفارهم اقلعهم لوووووووووول حلوه اقلعهم اي وانا صاجه ليش يعني ماقلعهم اقلع ابوهم بعد مدونتي وانا حره فيها شنو غصب اللي ابيه يدش ولي مابيه مع السلامه ,,,,,,,,,,,,,,,المهم شلونكم شخباركم عساكم طيبون وعساكم تعشيتوا لان بصراحه الوجبه اللي عندي ماتكفي ,,,,,,,,,,,,,, ياللا ها يمكن بعد تشبعني باجر ان الله سبحانه احيانا بقول لكم سالفه الحين بدش انام تعبانه بعد شنو كيفي مدونتي وانا حره فيها اكتب الحين باجر كيفي ياللا جاووووو تصبحون على خير

الاعمى والاخرس

يقول ابوي الله يسلمه ان فيه لغز محد عرفه ليما اليوم وان العالم كله حاول يفك هذا اللغز وماقدر يفكه عجز وفشل وان كبار المفكرين دزوا لكل دول العالم عشان يستفسرون منهم اذا كان فيه عندهم من يعرف حل هذا اللغز بس محد عرفه ليما اليوم وطبعا بما اني عالمة زماني وصاحبة اكبر مدونة في النت وعشان احّر وأبط جبد اللي في بالي قلت لبوي يبه شنو هذا اللغز قال ان هذا اللغز صعب يابنيتي قلت له مو مشكله يبه يمكن احله فضحك قال العالم كله ماعرف يحله انتي يامنول تقدرين قلت ليش لا يبه مستهين فيني قول قول انك مستهين قال لا طبعا قلت له يللا قول شنو هذا اللغز فقال لي اذا واحد اخرس عنده صديق اعمى وهذا الاعمى مات اخوه فشلون الاخرس يعلم صديقه الاعمى بان اخوه مات يمه يمه شنو هذا اللغز صج شلون يعلمه هذا اخرس لو يأشر ماراح يشوف الاعمى الاشاره وبعدين الاخرس مايتكلم عشان يسمعه الاعمى ويعرف بان اخوه مات المهم اخذت افكر وافكر وافكر وافكر وافكر وافكر وهم قمت افكر وافكر وافكر وظليت افكر وافكر وافكر لين عرفت الحل جان اروح لبوي ركضه وقلت له يبه يبه يبه فاخترع ابوي وقال لي شفيج قلت له يبه عرفت الحل قال اي حل قلت حل الاعمى والاخرس فقال ياللا قولي شنو الحل قلت الحل ان الاخرس اييب سيف ويقطع ذراع الاعمى الايمن وخلاص هذا حل اللغز فاستغرب ابوي وقال لي ليش يقطع ذراعه الايمن قلت يبه مو يقولون ان الاخو عضيد يعني ذراعك الايمن خلاص يقطع ذراعه الايمن ويفهم الاعمى ان عضده مات يعنياخوه مات فضحك ابووووي وقال تصدقين والله يمكن هذا الحل جان ااركض عند التليفون واييبه عند ابوي وقلت له ياللا ياللا اتصل في العالم كله وقول لهم ان بنتي حلت اللغز اللي العالم كله ماعرف يحله ليما اليوم بس عشان تعرف ها ان بنتك ها بيكون لها شأن كبييييييييييييييييييير اوي اوي ان شاء الله

بالله وين يلعبون علموني

ابوي العود للحين يسمي الكره طمباخيه مدري طنباخيه المهم فيها طنب واذا شاف الصبيان يلعبون بالكره بالصاله قام يصارخ الكهرباء الكهرباء اموت وعرف شدخل الكهرباء في الكره الليتات ولاصقه بالسقف يعني املك حد يجيسها والصاله كبر بطن حصوه شكبرها يعني الكهرباء هاذي من وين جت براس ابوي العود مدوخنا والله مره سالته قلت له يبه العود الطنباخيه مالتكم قبل شلون صايره جان يقول مثل مالتكم هاذي قلت مو معقوله اللي توصل للكهرباء هاذي اكيد كرة ارضيه بس مصغره يزعل ويلحقني بعصاه كله يقول حق امي هاذي بنتج يبي لها قص بلعوم يمه يمه يبي يقص بلعومي بسم الله عليّ ان شاء اللي يكرهني وانا عارقه من هي اللي تكرهني المهم قلت لامي يمه شوفي احسن حل خلي الصبيان يلعبون في السرداب هذا احسن حل جان تقول لالالا توني مسويه الحمامات وخاسره عليها والله حاله يمه شدخل حماماتج بالكره الصبيان يلعبون فيها بالسردااااااب مو في الحمام جان تقول اي ادري واحد منهم يروح الحمام وينسى يقفله وتدش الكره وتحوش الكهرباء ياااذي الكهرباء هم ردينا للكهرباء احسن شي يلعبون بره بالسكه بعييييد المهم طلعوا ولعبوا وفتكينا وبعد جم يوم انا يايه من المدرسه شنو تعبانه وللا اشوف امي ويهها حمر جنها معصبه جان اقول لها شفيج يمه جان تقول يارتنا توها يايه تتهاوش تقول الصبيان طقوا الكهرباء مالت بيتهم يعني بالله وين يلعبون احسن حل اتصل بوزارة الكهرباء يوم يشبونها ويوم يطفونها عشان اخواني يلعبون كره مو صح لالالا قولوا بعد غلطانه عشان احط حرتي كلها فيكم

خبر مو حلو كلش مو حلو

حصوه بنت ام حصوه درت عن المدوه مدري منو علمها حسبي الله عليها خو انا ماخليت حد ماعلمته عن مدونتي حتى نانسي عجرم دشيت علي موقعها وعلمتها المهم الحين النسره درت عن مدونتي وخل تقرا كيفها انا ماكتب شي غلط بس بما انها عرفت فانا بطلب من الشباب يعني الذكور لا احد يرد عليّ
مالي خلق حق الهواش والمناجر مع امي باجر تعلمها بنتج مسويه مدونه تسولف مع الصبيان يمه يمه والله يذبحوني اقروا وانسحبوا بشويش وسكروا الباب ولا اقول لكم طرفوه يمكن تدش حصوه ويصفقها على راسها ماحبها غصب

اخر موضة

اكره شي عندي لما اطلع من المدرسه وشوف صبيان واقفين علبو ينطرون خواتهم اللي نافش كشته ولي مبودر خده ولي قاض دبة سيارته يعني ستايل مالت عليك وانت وستايلك صوت سيارته توصل للاحمدي وهو مايل يجسمه وماسك السكان وسيجارته بحلجه يعني كلش ريال يعني شوفوني ميانين والله وكلنا صغار اكبر وحده اللي برابعه وحضرتي اللي بثالثه والباجي دقه مايفهمون شي لا والمصيبه لويعني طالعناه على طول رفع سماعه تليفونه جن يقول تبين الرقم والله مال طق بالجنطه على راسه بقول لكم هالسالفه مره طلعت بالهده انطر ابوي وابوي الله يسلمه يتاخر شوي فكنت قاعده مع رفيجتي ننطر اهلنا وللا ايينا صبي يمه يمه يمه شنو شكله من مجاهل افريقيا نص شعره صوب والباجي صوب وحاط على خشمه لون حمر يعني حضرته منشول يعني تمويه عشان لا احد يجكه وبيده كلينكس ولما شافنا قط الكلينكس انا قلت حق رفيجي شوفي الخبل يقط الكلينكس بالشارع جان تقول لي انتي الخبله هذا قاط رقمه علينا قلت لها من صجج قالت اي والله قلت ايل ليش خشمه حمر هذا منشول جان تقول لي الشباب هابين هاليومين بهاذي الطريقه عشان مايجكونهم الحراس خوش تفكير بس مايفكرون بدراستهم واهلهم اللي مخاسير عليهم يفكرون بشي كله عيب في عيب انا بس ودي اعرف شغله هذا الشاب مايفكر ماعنده مخ يعني بدل مايقط ورده علينا او يقط ورقه معطره عشان يمكن ناخذها يقط كلينكس ماش فيها خشمه ويبي بنت تاخذ هالكلينكس عشان تشوف رقمه وين قاعدين بعدين حتى لو يسوي هالاشياء مافيه بنت راح تفكر تاخذ الرقم بس انا قصدي هالمخ اللي فاره صوب الشيطان

شرق ورق

اليوم مو رايحه المدرسه مريضه شنو ماأمرض امي تقول لي انتي مسويه روحج مريضه عشان ماتروحين المدرسه عشان بس شافتني قاعده ع النت يعني المريض مايدش النت اصلا احسن عشان ينسى المرض بعدين انا رحت معاها الطبيب وعطاني وصفه وعطاني اجازه والاهم من كل هذا ان كل درحاتي امتياز مو كلها عاد عشان ماجذب بس اغلبها وللي مو امتياز جيد جدا بس شنو يبون المهم رحت الطبيب قلت له لساني يعورني قال لي عاضته قلت شنو مينونه اكو وحده تعض لسانها عطاني مرهم وحبوب وقررت خلاص مابي ادش الطب اي والله عاضه لساني عاد لوتشوفونه اذونه شطولها والله مالت عض بس مسكت نفسي امي تقول لي شنو قال لج الطبيب قلت لها يقول لي اكلي بصل فاستغربت هو شحقه تاكلين بصل قلت بعد اهو يقول جذيه وياليتني ماقلت خيشه حطتها جدامي ياللا انتي مرضه اكلي بصل وانا اكل وعيوني تدمع مايسوى علينا هالمرض المره الثانيه بدور لي على مرض اخف شوي وان شاء الله ماشوف الطبيب ابو اذان طوال هالمره ان شفته مو اعضهم اشلعهم
نست اقول لكم شغله ترى نشرت مدونتي بكل مكان يعني توقعوا بعد شهر راح تكون مدونتي اهم مدونة في تاريخ الانسانية طبعا ليش لا

عشان كوس هدونا

ان شاء الله باجر يصير غبار ومطر وعواصف ورعد عشان يهدونا من المدرسة .. شمعنى قبل يهدونهم لما تصير عواصف وامطار نفس المدارس ماتغير شي بس الحين مايبون يهدونا عشان يغثونا بالدراسه ترى انا اقول هالكلام مو لاني مو شاطره بالعكس انا اخذ امتياز دايما بس يعني هالشغلات ماتصير الا كل سنه مره خلونا نستانس نحس في العواصف والامطار واي وناسه لما ايي ابوي ياخذني وللا امي عشان فيه مطر وعشان فيه رعد وبردي ترى شي جو يعني . فيه اغنيه حق سعاد عبدالله تقول عشان كوس هدونا انا سألت ابوي عن الكوس قال يعني الرطوبه اوووللا رطوبه يهدونهم هذا يعني كل الصيف هده واحنا امطار وعواصف ومايبون يهدونا .